තාමත් අප නිදි ද?
ශ්රි ලංකා නීතියට අනුව ගත් කල වයස අවුරුදු 18ට අඩු අය ළමුන් ලෙස හඳුන්වනු ලැබේ...එක්සත් ජාතින්ගේ ප්රඥප්තියේද මේ බව සදහන්ව ඇත..ලංකා දණ්ඩ නීති සංග්රහයේ 75 වන වගන්තියට අනුව වයස 8ට අඩු ළමයෙකු විසින් කරනු ලබන ක්රියාවක් වරදක් නොවන බව එහි සදහන් කර ඇත.. පසුගිය ජනමාධ්ය මගින් අපට දැනගන්නට ලැබුනේ හද කම්පා කරනු ලැබු සිද්ධීන්ය..අවුරුදු 14ට අඩු කුඩා දරුවන් දුෂණය කිරීම් සහා මරා දැමීම් පිළිබඳ වාර්තා විය. මේවා අසන දකින අය අනේ! අපොයි කීවත් මෙය තමුන්ට හෝ තමුන්ගේ කෙනෙකුට මේ දේ සිදු නොවනු නිසාත් තමුන්ට සිත් නොරිදෙන නිසාත් ඒ සිදුවීම තවත් සිදුවීමක් පමණි.. මාගේ කෙනෙකුට අපේ කෙනෙකුට මේ දේ සිදුවන තුරු අපි නිහඬය.. දකින දකින පාර වල හංදිවල බුදු පිළිම,සුරුවම් ස්ථාපිත කර තිබුණත් පන්සල්,පල්ලි,කෝවිල් සැතපුමෙන් සැතපුමට තිබුණත් උදේ හවා ධර්ම දේශනා ජනමාධ්ය තුලින් විකාශණය වුවත් බොහෝ මනුෂ්ය හදවත් තුල ජීවිත තුල කිසීම ධර්මයක් නැති බව දෑසේ කඩතුරා හැර බලන කෙනෙකුට මනාවට පැහැදිලි වෙයි..මෙයට වග කිව යුත්තේ කවුරුන්ද?
ළමා අපචාර,ස්ත්රී දූෂණ සහා මිණිමැරුම් පසුගිය කාලයේ වැඩි වශයෙන් සිදු වුනේ රටේ වගකීම් භාරගෙන රටේ ජනතාවගේ බදු මුදලින් ජීවත්වන කාමාතුරයන් අතින්ය..නමුත් මේ සියල්ල පවතිද්දි රජය මුනිවත රකිමින් අසරණයන්ට යුක්තිය ඉටු නොකර නීතිය තම දෑතට ගනිමින්ද කාමාතුරයන් රකිමින්ද තද නිහඬතාවයක පසු වන්නේ කාගේ වරදින්ද? මානුෂ්යාගේ ආත්මීක ජීවිත වර්ධනය කරමින් මනුෂ්යන්ගේ පාපයෙන් ඈත් කර තැබීමට කැපවි වැයවෙන ,පූජ්ය,පූජක පැවදි වූවන් බහුතරයක් තද නින්දකට යොමුවී තද නිහඬතාවයක පසු වෙයි..ඔවුන්ගේ වගකීම යුතුකම කාලයේ සලකුණු තුලින් මනුෂ්ය ආත්ම ගැලවීම වූවත් මනුෂ්යා සීග්රයෙන් පාපයෙන් විනාශය කරා යද්දී වගකීමෙන් යුතු ආගමීක නායකයන් පවා නිහඬව සිටීම අපගේ අනාගත ඉරණම මොනවට කියා පායි...
මේ කුඩා වූවන්ගේ කෙනෙකු නොමගට යවන යම් කෙනෙක් වේද ඔහුගේ ගෙලේ ඇඹරුම් ගලක් එල්ලා හෙලිය යුතු බව මේට වසර 2000සට පෙර ජේසුතුමා පැවසුවා නම් අද පවතින දූෂිත සමාජය දෙස බලන විට එයට වඩා තද දඩුවම් වැරදි කරුවන්ට හා වැරදි කීමට උඅදව් කල සැමට ලබා දිය යුතුය.. නමුත් නීතිය වරදට සරිලන දඩුවම් වෙනුවට ලිහිල් පිළිවෙත් නීතිගත වීම නිසා වරදට ඇති බිය පහවී ගොස් මනුෂ්ය වරද තුලම තව තවත් කිමිදීමට අවස්තා සලසා දෙමින් මුදලට බලයට නීතිය යටකර ගැනීමට ඉඩකඩ තිබෙන නිසාත් මනුෂ්ය හදවත් තුල තිබිය යුතු දයාව කරුණාව සහ ආදරය වෙනුවට ආත්මාර්ථය රජ කරන යුගයක් බිහිවී අපගේ අනාගත පරපුර අබල දුබල කර විනාශ කර දමනු දැක දැක අප සියළු දෙනාම නිහඬව සිටීමෙන් අප රටේ අනාගතයට මේ වෙන්නාවු විනාශයට අපද හවුල් කරුවන් බව මේ නිහඬතාවය කියාපානු ඇත..
ගරු මේරි ලුවඩිස්
පැවදි සොයුරිය
වැල්ල වීදිය මීසම
(ඥානාර්ත ප්රදීපය කතෝලික පුවත් පතෙන් උපුටා ගන්නා ලදී )
